Ran 25 ga wata, yayin taron manema labarai, kakakin ma'aikatar kwadago da ba da tabbaci ga zamantakewar al'umma Yin Chengji ya bayyana cewa, cikin farkon rabin shekarar bana, yawan karin mutanen da suka samu aikin yi guda miliyan 7.25 a birane da garuruwan kasar Sin, inda adadin ya nuna karin dubu 310 idan aka kwatanta da na makamancin lokacin bara.

Yin Chengji ya kuma nuna cewa, a farkon rabin shekarar nan, kasar Sin ta ci gaba da fitar da manufofin da za su iya samar da karin guraben aikin yi a kasar, musamman ma ga wadanda suka kammala karatu a jami'o'i, da kuma wadanda suke cikin mawuyacin hali a birane da dai sauransu.

Bugu da kari, bisa labarin da aka samu, ayyukan samar da hidimomin kasar Sin na ci gaba da bunkasa cikin sauri. Hakan ya ba da taimako sosai wajen samar da karin guraben aikin yi a kasar, musamman ma cikin wasu sabbin ayyukan hidimomi, da kuma ayyukan hidimomi da suka shafi intanet da dai sauransu. (Maryam)