Bisa labarin da aka samu daga kafofin watsa labarai na kasar Mali a ranar 10 ga wata, an ce, shugaban wucin gadi na kasar Mali Dioncounda Traore ya bayyana a Bamako, babban birnin kasa cewa, bisa jadawalin da aka tsara, za a kada kuri’un babban zaben shugaban kasa zagaye na daya ran 28 ga watan Yuli Kuma ran 9 ga wata, Mr. Traore ya gana da ‘yan takara guda 28 da za su shiga babban zaben a fadar shugaban kasa, inda ya bayyana cewa, koda yake an riga an kawo karshen rikice-rikice dake addabar kasar, a hannu guda, kawo wannan lokaci ba a samu cikakken yanayin kwanciyar hankali a kasa ba, shi ya sa babban aikin dake gaban sabon shugaban kasa shi ne, warware matsalolin da kasar ke gamuwa da su a halin yanzu, da kuma samar da damar ciyar da kasar gaba. Traore ya kara da cewa, ko da yake wasu daga ‘yan takarar na fatan a jinkirta babban zaben, sai dai wannan dabara ba za ta iya warware matsalolin da kasar ke fama da su a halin yanzu ba, muddin dai gwamnatin wucin gadi, da ‘yan takarar ba su hada kai wajen warware matsalolin ba. Dukkan ‘yan takara suna zaman daidai wa daida kafin zaben. (Maryam)