A ranar 16 ga wata, mataimakin shugaban hukumar kididdiga ta jihar Xinjiang mai cin gashin kanta ta kasar Sin Wang Yue, ya bayyana cewa, bayan da aka yi shawarwari game da ayyuka na gwamnatin tsakiya ta jihar Xinjiang, halin da ake ciki wajen raya tattalin arziki da zamantakewar al'umma a jihar ya samu bunkasuwa cikin hanzari da inganci, kuma zaman rayuwar al'umma ya samu kyautatuwa sosai, yayin da alkaluman awon tattalin arzikinta ke sahun gaba a dukkanin fadin kasar Sin.

Daga shekarar 2009 zuwa shekarar 2012, matsakaicin yawan kudaden da aka samu wajen samar da kayayyaki ya karu daga dalar Amurka 2920, zuwa 5372. Haka kuma, idan aka bi ma'aunin bankin duniya na shekarar 2007, matsakaicin yawan kudin shiga na jihar Xinjiang ya samu kyautatuwa idan an kwatanta da na ragowar sassan duniya.

Wang Yue ya bayyana cewa, bayan da aka yi shawarwari game da ayyukan jihar Xinjiang, jihar ta mayar da batun samun bunkasuwa, ya zama wani babban aiki, ta hakan ne jihar ta ci gaba da yin amfani da fiffikonta, da raya masana'antu da raya aikin gona na zamani, da raya sabbin garuruwa, don kyautata ingancin kayayyaki, da ci gaba, da raya tattalin arzikin jihar.(Bako)