2019-12-19 10:54:02        cri

Bisa gayyatar da majalisar dokokin kasar Benin ta yi masa, mataimakin shugaban majalisar ba da shawarwari kan harkokin siyasa ta kasar Sin Shao Hong ya jagoranci wata tawagar wakilan Sin, inda suka kai ziyarar aiki a kasar Benin. A ranar 17 ga wata, shugaban kasar Benin Patrice Talon ya gana da wakilan kasar Sin a birnin Cotonou.

A yayin ganawar tasu, Shao Hong ya ce, kasar Benin dadaddiyar abokiyar kasar Sin ce a yammacin nahiyar Afirka, kuma muhimmiyar abokiyar hadin gwiwar kasar Sin ce. kasar Sin tana son hada kai da kasar Benin wajen aiwatar da sakamakon da aka samu yayin taron dandalin tattaunawar hadin gwiwar Sin da Afirka da aka yi a birnin Beijing, domin samun sakamako mai gamsarwa da kuma tallafawa al'ummomin kasashen biyu.

A nasa jawabin, shugaba Talon ya nuna yabo matuka kan dangantakar abokantaka dake tsakanin Sin da kasarsa, ya kuma taya kasar Sin murnar cika shekaru 70 da kafa jamhuriyar jama'ar kasar Sin. Haka kuma, ya ce, yana fatan karfafa mu'amalar dake tsakanin manyan jami'an kasashen biyu, ta yadda za a zurfafa hadin gwiwar dake tsakanin kasashen biyu a fannoni daban daban yadda ya kamata. (Maryam)