Shugaban hukumar binciken sararin samaniya ta kasar Sin Zhang Kejian, ya bayyana cewa, kasarsa na shirin gina wata cibiyar binciken kimiya a yankin kudancin duniyar wata, inda za ta gudanar da binciken sararin samaniya na kimanin shekaru goma.

Jami'in ya bayyana hakan ne yayin bikin bude ranar nazarin sararin samaniyar kasar Sin da ya gudana a Changsha, babban birnin lardin Hunan dake tsakiyar kasar Sin.

Zhang ya kuma bayyana cewa, kasar Sin za ta harba tauraron dan-Adam na Change-5, don dawo da samfurorin da ya tattaro zuwa doron duniyarmu a karshen shekarar 2019. Haka kuma kasar ta Sin na harba wani tauraron dan-Adam na farko don gudanar da bincike a duniyar Mars a shekarar 2020. (Ibrahim Yaya)