Jiya Jumma'a da yamma, mamban majalisar gudanarwa, kana ministan harkokin wajen kasar Sin Wang Yi ya halarci bikin bude taron kolin kafofin watsa labarai na Sin da Indiya, inda ya bayyana cewa, an cimma nasarar gudanar da taron tsarin musayar al'adu tsakanin Sin da Indiya karo na farko. An tsara wannan shiri ne bisa ra'ayi daya da shugaba Xi Jinping na kasar Sin da firaministan kasar Indiya Narendra Modi suka cimma, lamarin da ya nuna burin shugabannin biyu wajen karfafa musayar al'adu a tsakanin al'ummomin kasashen biyu.

Cikin taron da aka yi a wannan rana, bangarorin biyu sun cimma ra'ayi daya a kan cewar, za a karfafa musayar al'adu a tsakanin Sin da Indiya wadda za ta tallafawa kasashen biyu a kokarinsu na neman raya kansu. Ya kamata kasashen Sin da Indiya su kara musayar dake tsakaninsu bisa tsarin kungiyar hadin gwiwa ta Shanghai, kasashen BRICS, hadin gwiwar kasashen gabashin Asiya da kuma dandalin tattaunawar kasashe masu dogon tarihi da dai sauransu, ta yadda za a ba da gudummawa wajen inganta zaman lafiya da ci gaba na shiyyar da suke ciki, har ma na kasashen duniya baki daya. (Maryam)