Babban sakataren Majalisar Dinkin Duniya Antonio Guterres, ya bayyanawa kafofin watsa labarai a jiya Alhamis, a hedikwatar majalisar dake birnin New York cewa, akwai shugabannin kasashe 84, gami da kusoshin gwamnatoci 44, wadanda za su halarci taron kolin MDD a makon gobe, inda za a yi babbar muhawara, ta babban taron MDD karo na 73.

Guterres ya ce, halartar wadannan shugabanni gami da kusoshin gwamnatocin kasashe daban-daban, na shaida irin amincewar da kasashen duniya suke nunawa MDD. Guterres ya ce, zai yi amfani da wannan dama, don neman kasashe daban-daban, su yi sabon alkawari ga MDD, kasancewar ta dandalin tattauna hadin-gwiwar kasa da kasa da ba za'a iya rayuwa ba bu ita ba. Har wa yau, Guterres ya nuna damuwa, game da "yadda wasu bangarori daban-daban ke nuna kyama" ga ra'ayin halartar kasashe daban-daban a harkokin duniya.(Murtala Zhang)