Shugaban hukumar zartaswar kungiyar hadin kan Afirka ta AU Moussa Faki Mahamat, ya bukaci 'yan siyasar kasar Zimbabwe, da su kau da banbance banbance, su yi aiki tare, domin tabbatar da zaman lafiya da daidaito, da ci gaban kasar su baki daya.

Moussa Faki Mahamat, ya bayyana matukar takaicinsa, game da rasa rayukan da aka samu, sakamakon hargitsin da ya biyo bayan fidda sakamakon babban zaben Zimbabwe da ya gudana a ranar 30 ga watan Yulin da ya gabata.

To sai dai kuma ya yi maraba da matakan da mahukuntan kasar ke dauka, na tabbatar da gudanar da bincike, game da tashin hankalin da ya auku da nufin hukunta masu hannu a cikinsa. (Saminu Hassan)