Ibikunle Daramola, kakakin sojojin saman Najeriya ya ce, sun yi nasarar kaddamar da hare hare ta sama a yankin Daban Masara dake jahar a ranar Juma'ar da ta gabata, inda suka yi imanin hallaka mayakan 'yan ta'addan masu yawan gaske.
Kakakin ya ce wani jirgin saman sojojin ya samu nasarar jefa boma bomai a yankunan da suke son kai harin, inda suka yi nasarar lalata wurare masu yawa inda mayakan na Boko Haram ke samun mafaka.
Najeriya tana samun gagarumar nasara a yankin da take da kungiyoyin 'yan ta'adda, inda dakarun tsaron kasar suka yi nasarar fatattakar mayakan na Boko Haram daga dajin Sambisa, wanda a baya ya kasance babban sansanin horaswa na mayakan 'yan ta'addan. (Ahmad Fagam)