Hukumar zaben kasar Zimbabwe ZEC, ta bayyana sakamakon farko farko na babban zaben kasar da aka kada a jiya Talata, wanda ya nuna cewa jam'iyyar ZANU-PF mai mulki, na kan gaba da kujerun wakilci 6, yayin da jam'iyyar adawa ta MDC Alliance ke da guda daya.

Zimbabwen dai na da jimillar kujerun wakilci 210. Ana kuma sa ran kammala bayyana sakamakon zaben shugaban kasar da ya gabata nan da ranar Asabar 4 ga watan nan na Agusta.

Shugaban hukumar zaben kasar ta ZEC Priscilla Chigumba, ta ce hukumarta za ta ci gaba da bayyana sakamakon zaben da zarar sun tattara alkaluma. (Saminu Hassan)