Jiya Alhamis ne, kwamitin sulhu na MDD ya kira taron kada kuri'u kan daftarori biyu da kasashen Amurka da Rasha suka gabatar, game da bukatar tsawaita wa'adin yin bincike kan zargin amfani da makamai masu guba a kasar Syria.

A yayin taron, ba a zartas da daftarorin da bangarorin biyu suka gabatar ba. Lamarin da ya nuna cewa, kwamitin binciken zai kammala aikinsa a yau 17 ga wata, kamar yadda aka tsara tun farko.

Kasashen Amurka da Rasha dai sun bukaci a tsawaita wa'adin aikin gudanar da binciken wannan zargi zuwa shekara daya. Amma a cikin daftarin da kasar Rasha ta gabatar, ta zargi hanyar yin bincike da kwamitin gudanar da wannan bincike yake bi, sa'an nan ta nemi a tattara da kuma yin nazari kan bayanai game da yadda wadanda ba na gwamnati ba suka taba yin amfani da makamai masu guba. A sa'i daya kuma, cikin daftarin da kasar Amurka ta gabatar da shi, ta bukaci a tsawaita wa'adin aikin zuwa watanni 12, a maimakon watanni 24 wato kamar yadda ta bukata tun farko. (Maryam)