Kakakin ma'aikatar harkokin kasuwanci ta kasar Sin, Gao Feng ya ce, daga watan Janairu zuwa Satumbar shekarar da muke ciki, cinikayya dake tsakanin kasar Sin da kasashen dake cikin shawarar 'ziri daya da hanya daya' ta tasam ma dalar Amurka biliyan 786, adadin da ya karu da kashi 15 bisa dari na makamancin lokacin a bara, abun da ya samar da guraban ayyukan yi fiye da dubu dari biyu a wuraren.

Gao Feng ya bayyana haka ne a jiya yayin wani taron manema labarai, inda ya ce, kawo yanzu, kamfanonin kasar Sin na nuna himma da kwazo wajen gina yankunan hadin-gwiwar cinikayya da kasuwanci a wasu kasashe 24, lamarin da ya samar da dimbin guraban ayyukan yi.

Har wa yau, Gao ya ce, ana nan ana gaggauta gudanar da wasu muhimman ayyukan hadin-gwiwa tsakanin kasar Sin da kasashen dake cikin shawarar 'ziri daya da hanya daya'. A nan gaba ma, ma'aikatar harkokin kasuwancin kasar Sin za ta ci gaba da aiwatar da nasarorin da aka samu a wajen babban dandalin tattaunawa na hadin-gwiwar kasa da kasa kan shawarar 'ziri daya da hanya daya', da kara musayar ra'ayi da kasashen dake cikin shawarar, a wani kokari na habaka tattalin arzikin duniya baki daya.(Murtala Zhang)