Shi dai Fayose dan jam'iyyar PDP ne.
Da yake jawabi a Abuja, fadar mulkin Najeriyar, gwamnan ya shedawa magoya bayansa cewa, shi kadai ne mutumin da zai iya yin galaba a kan shugaban kasar mai ci Muhammadu Buhari idan aka gudanar da sahihin zabe a kasar, sakamakon irin nasarar da ya samu a tarihin siyasarsa, wanda ya bayyana cewa tun da ya fara siyasa bai taba shan kaye a zabe ba.
Ya yi alkawarin cewar muddin aka zabe shi shugaban Najeriyar, zai gudanar da yaki da rashawa bisa adalci.
Ya kara da cewa batun tattalin arzikin kasar zai farfado da shi kuma zai samar da gagarumin ci gaba ga kasar fiye da gwamnati mai ci wanda ya bayyana a matsayin gwamnatin da ta gaza. (Ahmad Fagam)
