A nata bangare, kasar Amurka ta yi kira ga kasashen Sin da Rasha, da su matsa wa kasar Koriya ta arewa lamba a wannan lokaci. Game da wannan kira, madam Hua Chunying ta ce, matsalar mafi tsanani game da batun nukiliyar Koriya ita ce, sabanin dake tsakanin kasashen Koriya ta arewa da Amurka. Don haka kamata ya yi bangarorin da abun ya shafa, su dage wajen sauke nauyin dake wuyansu yadda ya kamata.
A yayin taron manema labaru da ma'aikatar harkokin wajen kasar Sin ta kan shirya na rana rana a yau Jumm'a, madam Hua Chunying ta ce, al'ummomin duniya suna tsayawa kan matsayin tabbatar da ganin an warware batun nukiliyar yankin Koriya ta hanyar siyasa da diflomasiyya. A waje daya, karin mutane na ganin cewa, saka takunkumi ba zai warware matsalar daga asali ba. Abun da ya fi muhimmanci da kuma ya kamata kowane bangare ya yi ba tare da bata lokaci ba shi ne, dakatar da dukkan matakai ko kalamai, wadanda za su tsananta halin da ake ciki.
Har ila yau, ya kamata kowane bangare ya yi namijin kokari, na daukar matakan a zo a gani, game da yadda za a aiwatar da kudurin MDD daga dukkan fannoni cikin daidaito, ta yadda za a iya kafa yanayi na neman dabaru masu dacewa, ta warware matsalar da ake fuskanta ta hanyar tattaunawa cikin ruwan sanyi. (Sanusi Chen)