Kasar Sin za ta bullo da wasu matakan yin gyare-gyare da nufin samar da yanayin da ya dace ga harkokin kirkire-kirkire da kuma raya kasa. An cimma wannan matsaya ce yayin taron majalisar zartaswar kasar na jiya Laraba da Firaminista Li Keqiang ya jagoranta.

Wata sanarwa da aka fitar bayan taron, ta bayyana cewa, an cimma wannan shawara ce, bayan nasarar da aka samu a wasu manufofin yin gyare-gyare na gwaji kan yadda za a inganta wasu hukumomi da yanayin kasuwannin masana'antu da bangaren kirkire-kirkire, inda mahalartar taron suka goyi bayan cewa, lokacin ya yi da za a aiwatar da wadannan gyare-gyare a kasa baki daya.

Sanarwar ta kara da cewa, idan har ana son a karfafa gwiwar harkokin da suka shafi kirkire-kirkire, to, wajibi ne a tallafawa kanana da matsakaitan masana'antu da kudade. (Ibrahim Yaya)