Ya ce kasar Sin ita ce ja gaba a wannan fanni, yana mai cewa, a shirye Sin take a ko da yaushe ta inganta kayayyakin more rayuwa a kasashe kawayenta.
Kungiyar ETA, babbar kungiya ce mai zaman kanta a Masar, wadda ke bibbiya tare da fitar da rahotanni game da tsarin sufuri a kasar dake arewacin Afrika.
Mohammed Shehata, ya ce kasar Sin na taimakawa kasashe da dama, musamman a Afrika wajen gina sabbi kuma nagartattun layukan dogo, yana mai jadadda cewa, babbar kasar ta nahiyar Asia ba za ta yi kasa a gwiwa ba wajen samarwa Masar kwararru a fannin shimfida layukan dogo da kuma harkar sufuri baki daya.
Har ila yau, ya ce gara kasar Sin ta gyara hanyoyin sufurin Masar a kan sauran kasashen nahiyar Turai, tun da baya ga kwararru da take da su, ta kan biya kudin aiki, sannan ta bada rangwamen farashi.
Ya ce ba kamar kasashen Turai ba, kasar Sin ba ita ke zabar kamfanonin da za su yi aikin ba. Sannan tana bada kudin ne ta hanyar rance daga bankunan kasar.
Mohammed Shehata ya kara da cewa, damawa da kasar Sin wajen sake gina layukan dogo a Masar, za ta taimaka wajen bunkasa shawarar "ziri daya da hanya daya" da zai hada Afrika da Asia. (Fa'iza Mustapha)
