Wani binciken kimiya da aka gudanar a jikin gawar jami'in hukumar zabe da shata kan iyakoki na kasar Kenya Chris Msando ya nuna cewa, an gana masa azaba ne daga bisani kuma aka shake masa wuya har sai da ya mutu.

Msando dai yana daga cikin manyan jami'an hukumar zaben kasar wadanda ke rike da lambobin asiri na na'urori masu kwakwalwa na hukumar da kuma yadda ake adana sakamakon zaben kasar.

A ranar Litinin ne ake tabbatar da mutuwar jami'in, 'yan sa'o'i kafin ya tashi zuwa kasashen waje domin gwajin na'urorin bayyana sakamakon zaben kasar kai tsaye.

A ranar Asabar din da ta gabata ce aka samu gawarsa da ta wani dalibi dan shekaru 21 da haihuwa wanda ke karatun ilimin abinci mai gina jiki a cikin daji a wajen birnin Nairobi, fadar mulkin kasar. (Ibrahim Yaya)