Ma'aikatar tsaron kasar Aljeriya ta sanar da cewa, dakarun kasar sun yi nasarar hallaka 'yan tawaye masu dauke da makamai guda 6 a yayin da suke kaddamar da matakan yaki da ayyukan ta'addanci a yankin Upper Woods dake lardin Tipaza, mai nisan kilomita 60 daga Algiers, babban birnin kasar.

Wata majiya daga ma'aikatar tsaron kasar ta tabbatar da cewa, dakarun sun kwace bindigogi kirar Kalashnikov guda biyar gami da albarusai da wasu abubuwan fashewa a hannun 'yan tawayen

Majiyar ta kuma kara da cewa, ya zuwa yanzu dakarun kasar sun yi nasarar kashe 'yan ta'adda 8 tun lokacin da aka fara daukar matakan yaki da ayyukan ta'adanci a ranar 23 ga watan Yulin wannan shekara.

A kwanakin nan ne dai wasu 'yan ta'adda masu alaka da kungiyar Al-Qaeda reshen yankin Maghreb (AQIM) suka kafa kungiyoyin Daesh inda suka boye a yankunan kungurumin dajin dake iyaka da kasashen Libya da Mali da suka yi fama da tashin hankali. (Ibrahim Yaya)