Rundunar 'yan sandan birnin Manchester ta sanar da cewa, mutane 22 ciki har da yara ne suka mutu, kana wasu 59 kuma suka jikkata sakamakon wani harin kunar wake da aka kai jiya da dare a filin wasa na Manchester dake Ingila.

Sanarwar da rundunar 'yan sandan Greater Manchester ta bayar ta ce ta yi imanin harin da wani mutum guda ya kaddamar, hari ne na ta'addanci.

Babban jami'in 'yan sandan Greater Manchester Ian Hopkins ya tabbatar da cewa, maharin ya mutu a filin wasan kuma yana dauke da wani abin fashewa ne wanda ya haddasa wannan danyen aiki.

Sanarwar ta bayyana cewa, yanzu haka ana jinyar wadanda suka jikkata a asibitoci guda takwas dake sassa daban-daban na birnin Manchester.

Wani labari da dumi-dumi dake shigo mana na cewa, kungiyar IS mai tsattsauran ra'ayi ta sanar da daukar alhaki kan wannan harin.(Ibrahim Yaya)