A ranar Asabar din da ta gabata ne, aka sako 'yan matan 82, bayan cimma yarjejeniya, inda aka yi musayar 'yan matan ta hanyar sakin wasu daga cikin mayakan Boko Haram da gwamnati ke tsare da su.
Da yake jawabi a wani taro a Ibadan, kudu maso yammacin kasar, ministan ya ce nan gaba kadan za'a sake sako wasu karin 'yan matan dake hannun mayakan ta hanyar cimma matsaya tsakanin gwamnatin Najeriyar da mayakan.
A wani labarin kuma kungiya mai fafutukar ganin an sako 'yan matan na Chibok wato Bring Back Our Girls Group (BBOG), ta yaba wa gwamnatin Najeriya da hukumomin tsaron kasar saboda samun nasarar ceto 'yan matan 82.
Sanarwar yabon na dauke da sa hannun shugabar kungiyar fafutukar kuma tsohuwar minista, Oby Ezekwesili, wanda aka fitar a jiya Lahadi a Abuja, babban birnin kasar.
Tace an yi nasarar ceto 'yan matan ne ta hanyar hadin gwiwa tsakanin hukumomin tsaro, da sojoji, da gwamnatin Switzerland, da kungiyar Red Cross, da kuma sauran kungiyoyi na cikin gida da na kasa da kasa.(Ahmad Fagam)
