Sabon samfurin jirgin helikwafta kirar kasar Sin mai lamba AC313, wanda ke iya daukar kaya masu nauyi da aka yi gwajin sa a kwanan nan, ya cika sharuddan inganci na gudanar da ayyuka cikin yanayi mai tsauri.

An dai yi gwajin jirgin mai saukar ungulu ne yayin wani ruwan sama kamar da bakin kwarya, a birnin Jingdezhen dake lardin Jiangxi a gabashin kasar Sin ranar Juma'ar da ta gabata.

A cewar jami'an kamfanin Changhe, wanda ya kera jirgin, samfurin na AC313 na iya tashi da sauka a yayin ruwan sama mai tsanani, wanda hakan ke nufin za a iya aiki da shi a yayin ayyukan ceto, da na kashe wutar daji, ko sufurin jama'a. Kaza lika zai dace da ayyukan bada agajin lafiya, da yawon bude ido, da kuma zirga zirgar kasuwanci. （SaminuHassan）