Da karfe 12 da minti 11 na tsakar ranar jiya Litinin bisa agogon Beijing ne aka harba taurarin dan adam samfurin JL-1, da Cubesats XY-S1 da kuma Caton-1, ta hanyar amfani da na'urar roka mai lakabin Kuaizhou -1A, aikin da ya zamo irinsa na farko a fannin amfani da rokar harba kumbuna domin harkoki na kasuwanci.

An dai harba wadannan taurarin dan adam ne daga tashar harba kumbuna ta Jiuquan, wadda ke arewa maso yammacin kasar Sin. Kaza lika masu kula da aikin sun ce rokar Kuaizhou-A1 sabon samfuri ce ta Kuaizhou-1 wanda aka yi wa kwaskwarima, tare da kara wasu fasahohi na inganta aikinta, tana kuma iya harba tauraron dan adama da bai kai nauyin kilogiram 300 ba zuwa samaniya.

Daya daga kumbunan da aka harba wato JL-1 na aikin nazarin sassan duniya ne, yana kuma iya daukar hotunan bidiyo da ake amfani da su, wajen safiyon albarkatun kasa da gandayen daji, da aikin kare muhalli, da kuma harkar sufuri. Sauran fannonin sun kunshi ayyukan kare aukuwar bala'u da kuma na ba da agaji. (Saminu Hassan)