Firayin ministan Kasar Sin Li Keqiang, ya ce a bana, kasar za ta rubanya kokarinta wajen ganin ta samar da ci gaba tare da tunkarar duk wata barazana, da nufin samun dorewar tattalin arzikinta da kwanciyar hankalin al'umma.

Da yake gabatar da rahoton ayyukan gwamnatin kasar ga taron wakilan jama'ar kasar, Li Keqiang, ya ce samar da kwanciyar hankali na da muhimmanci gaya, inda ya ce dole ne a kiyayi kai wa matakin gargadi na rashin kudi, tare da tabbatar da kare muhalli da zamantakewar al'umma.

Rahoton ya ce a kokarinta na cimma wadannan muradu, kasar Sin za ta matse kaimi wajen aiwatar da sauye-sauye da za su kai ta ga samun nasarori a muhimman bangarori. (Fa'iza Mustapha)