Wata sanarwar da kakakin fadarsa Femi Adesina ya fitar, ta bayyana cewa, ba a sanya wani lokaci na komawar shugaban na Najeriya gida ba. Sai dai ta bayyana cewa Buhari na da bukatar kara hutawa, bisa shawarar likitansa.
Tsawaitar wa'adin da shugaban na Najeriya ya kwashe yana hutu na ci gaba da ta da kura, inda da yawa daga masu adawa da gwamnatinsa ke cewa, ya kamata a fayyace gaskiyar lamari game da yanayin lafiyar shugaban.
Kafin barinsa Najeriya, shugaba Buhari ya mika takarda ga majalissar dattijan kasar, yana mai bukatar baiwa mataimakinsa Yemi Osinbajo, damar ci gaba da jan akalar kasar, har zuwa lokacin da zai koma gida, kamar dai yadda hakan ke kunshe cikin kundin mulkin kasar. (Saminu Hassan)
