Hukumar kula da mutanen da suka kaura zuwa kasashen waje ta duniya ta gabatar da sakamakon sabuwar kididdiga a jiya Juma'a inda ta bayyana cewa, a shekarar bana 'yan gudun hijira da bakin haure a kalla 4636 ne suka mutu a kan hanyarsu ta ratsa bahar Rum zuwa nahiyar Turai, yawansu ya karu da fiye da dubu daya bisa na makamancin lokacin bara.

Hukumar kula da mutanen da suka kaura zuwa kasashen waje ta duniya ta gabatar da wani sabon rahoto a birnin Geneva cewa, yawancin mutanen da suka mutu suna kokarin ratsa bahar Rum ne daga arewacin nahiyar Afirka zuwa kasar Italiya, kana 420 a cikinsu sun mutu a gabashin bahar Rum a kan hanyarsu daga Turkiya zuwa Girka, da wasu 62 daga cikinsu sun mutu a yammacin bahar.

Bisa kididdigar da aka yi, ya zuwa ranar 18 ga wannan wata, yawan 'yan gudun hijira da bakin haure da suka ratsa bahar Rum zuwa nahiyar Turai a bana ya kai kimanin dubu 343 da dari 6, amma yawansu daga watan Janairu zuwa Oktoba na bara ya kai dubu 729. A ganin kakakin hukumar, wannan jimillar ta shaida cewa, yanzu ana fuskantar karin hadari ne yayin da ake kokarin ratsa bahar Rum zuwa nahiyar Turai. (Zainab)