Shugaban Afirka ta Kudu Jacob Zuma, ya ce gwamnatin sa na daukar karin matakai na raya sassan ci gaban kasa, da suka hada da inganta hakar ma'adanai, da noma da samar da ababen more rayuwa, da kuma bunkasa fannin masana'antu, a wani mataki na bada kariya ga sana'o'i, da kuma kara yawan guraben ayyukan yi ga 'yan kasar.

Shugaba Zuma ya bayyana hakan ne a birnin Durban, yayin taron gamayyar kungiyoyin 'yan kwadago na duniya, wanda ya gudana a jiya Laraba. Ya ce taron na bana na gudana a wani lokaci da ake fuskantar tarin matsaloli na tattalin arzikin duniya.

Sai dai duk da haka a cewar sa, muddin Afirka ta Kudu ta samu karin kaso daya bisa dari na ci gaba a shekara mai zuwa kamar yadda aka yi hasashe, hakan zai bada damar samar da guraben ayyukan yi sama da 80,000, yayin da karuwar kaso 3 bisa dari za ta haifar da guraben ayyukan yi 300,000.

Don haka shugaba Zuma ya jaddada kudurin gwamnatin sa na daga matsayin mizanin ci gaban kasar, kamar yadda hakan ke kunshe cikin sabon tsarin bunkasa kasar na shekaru masu zuwa.(Saminu Alhassan)