Rundunar sojin Najeriya ta ce sabon bidiyon da Boko Haram ta fitar, wanda ya yadu ta kafofin sada zumunta tun daga ranar Talatar da ta gabata na bogi ne. Bidiyon dai ya nuna wani mutum na ikirarin wakilcin shugaban kungiyar Abubakar Shekau, tare da tarin magoya bayansa, yana barazana ga hukumomin Najeriyar. To sai dai kuma tuni rundunar sojin ta Najeriya ta ce bidiyon wani shire ne kawai na kautar da tunanin mutane, daga irin rauni da kungiyar ke da shi a yanzu haka.

Cikin wata sanarwa da rundunar sojin ta fitar a jiya Alhamis, kakakin ta Rabe Abubakar, ya bayyana bidiyon da wani yunkuri da kungiyar ta Boko Haram ke yi na nuna har yanzu tana da sauran tasiri.

Sanarwar ta kara da cewa, ga alama bidiyon shi ne dai wanda kungiyar ta fitar a shekarar 2014, wanda kuma a wannan lokaci aka yi wa kwaskwarima. Rabe Abukakar ya kara da cewa sabon bidiyon ya sake nuna irin hali na rauni da Boko Haram ke ciki, don haka ba zai taba haifar da wata fargaba ko zama barazana ga dakarun kasar ba.

Yankin arewa maso gabashin Najeriya dai ya sha fama da tashe tashen hankula masu alaka da ayyukan mayakan Boko Haram cikin kusan shekaru 6 da suka gabata. (Saminu Hassan)