Kakakin ma'aikatar harkokin wajen kasar Sin Lu Kang ya bayyana jiya Laraba 24 ga wata, cewar za a kira taron koli karo na 11 na kungiyar G20 a ranar 4 da ranar 5 ga wata mai zuwa a birnin Hangzhou na kasar Sin. Kuma bisa gayyatar da shugaban kasar Sin Xi Jinping ya yi musu, shugaban kasar Amurka Barack Obama, da shugaban kasar Rasha Vlładimir Putin, da shugaban kasar Faransa François Hollande, sauran sun hada da shugaban kasar Afirka ta Kudu Jacob Zuma, da firaministar kasar Birtaniya Theresa May, da firaministan kasar Indiya Narendra Modi, sai kuma firaministan kasar Japan Shinzo Abe, da shugaban majalisar EU Donald Tusk‎, da shugaban kwamitin kula da harkokin EU Jean-Claude Juncker, da shugabannin kasashen Argentina, Brazil, Indonesiya, Koriya ta Kudu, Mexico, Turkiyya, Australia, Canada, Jamus, Italiya, Saudiyya za su halarci taron a matsayinsu na shugabannin kasashe mambobin kungiyar G20.

Haka kuma, shugaban kasar Chadi Idriss Déby, da shugaban kasar Masar Abdel-Fattah al-Sisi, da shugaban kasar Senegal Macky Sall, da shugabannin kasashen Kazakhstan, Laos, Singapore, Spaniya, da Thailand za su halarci taron a matsayin kasashe baki da aka gayyata.

Bugu da kari, taron zai kuwa samu halartar wasu shugabannin kungiyoyin kasa da kasa, ciki har da babban sakataren MDD Ban ki-Moon, da shugaban bankin duniya Kim Jim-Yong, da shugabar asusun ba da lamuni na duniya IMF Christine Lagarde, da babban daraktan kungiyar WTO Roberto Azevedo, da kuma shugabannin kungiyar kwadago ta duniya ILO, da kwamitin ba da tabbaci ga harkokin kudi FSB, kana da kungiyar hadin kan tattalin arziki don ci gaba OECD da dai sauransu. (Kande Gao)