Rahotanni daga Mali na cewa, dakarun musamman na kasar sun yi nasarar damke wani babban kwamandan kungiyar 'yan ta'adda ta Ansar Dine mai suna Mahamoud Barry wanda aka fi sani da Abou Yehiya. Ana zargin sa ne da kaddamar da hare-hare a arewacin kasar.

Wata majiyar tsaro ta tabbatar da cewa, an kama Barry ne a ranar Talata a kusa da dajin Wagadou daf da kan iyakar kasar Mauritaniya.

An haifi mutumin da ake zargin ne a shekarar 1979, kuma na hannun daman Amadou Kouffa ne, shugaban kungiyar 'yan ta'adda ta MLF wadda ke aiki kafa da kada da Ansar Dine.(Ibrahim)