Rundunar sojojin Najeriya ta bayyana cewa, dakarunta sun gano gawawwakin mayakan Boko Haram a kalla 25, bayan da bataliya ta 119 da aka girke a garin Kangarwa da ke arewacin jihar Borno ta dakile wani harin da mayakan suka yi yunkurin kaiwa a daren ranar Talata.

Kakakin rundunar sojojin Najeriya kanar Sani Usman, ya bayyana cewa, sojojin sun yi nasarar dakile harin da mayakan na Boko Haram suka kai da misalin karfe 6 da rabi na dare bayan da aka kwashe kimanin sa'o'i uku ana musayar wuta wadda ta kai ga jikkata 'yan ta'adda da dama.

Kanar Usman ya ce, daya daga cikin sojojin ya sa ransa yayin da 11 suka jikkata, baya ga motar sojojin guda da ita ma ta lalace sosai. Koda ya ke, tuni aka dauke gawar sojan da ya rasa ran nasa da kuma sauran sojojin da suka jikkata, yayin da kuma sojojin suka ci gaba da gudanar da sintiri a yankin.

Kakakin ya kuma bayyana cewa, sojojin sun yi nasarar kwato makaman harba rokoki 2, bindigogi masu sarrrafa kansu, bindiga kirar Ak-47 da wata karamar bindiga mai sarrafa kanta da sauran muggan makamai. (Ibrahim)