Gungun aikin na sanya ido kan matsalar, a ko da yaushe ya bayyana damuwarsa ga gwamnatin Amurka game da kisan bakaken fata da 'yan sanda suke yi tare da yin kiran ganin kotu ta yi aikinta, in ji sanarwar gungun kwararrun MDD kan mutanen dake da asilin Afrika.
A cewar wannan gungun aiki, a kasar Amurka, amfani da karfi kan bakaken fata da 'yan sanda suke yi ya wuce kima, kuma ya zama ruwan dare, domin ya nuna cewa 'yan sanda suna harbi kan bakaken fata fiye da kan fararen fata.
Ana kiran da a gaggauta bincike mai zaman kansa domin tabbatar da ganin an gurfanar da masu hannu cikin wannan matsala gaban kuliya, in ji shugaban gungun aikin na MDD kana kuma akalin musammun kan 'yancin dan adam, Ricardo A. Sunga III.
Sanarwar a fitar da ita a wannan mako, bayan mutuwar Philando Castile a Minnesota, da Alton Sterling a Louisiana, wadanda 'yan sandan Amurka suka harbe, da kuma kisan 'yan sanda biyar a tsakiyar Dallas a ranar Alhamis.
A karshe sanarwar tace "Lokaci yayi, yanzu ga gwamnatin Amurka ta tashe tsaye ta nuna cewa rayuwar bakake tana da muhimmanci da kuma mayar da hakan a matsayin aikin kasa game da wajabcin hana irin wannan kisa a gaba".
Gungun aikin ya kai wata ziyarar aiki a Amurka, a cikin watan Janairun shekarar 2016, kuma zai mika wani rahoton binciken da ya gudanar da kuma shawarwarinsa ga kwamitin hakkin dan adam na MDD a cikin watan Satumban shekarar 2016. (Maman Ada)
