Jami'in hukumar mai kula da jihar Usman Yakubu, ya shedawa 'yan jaridu a Lokoja cewar, an tura jami'an ne daga Abuja hedkwatar mulkin kasar tun a ranar Lahadin da ta gabata.
Ya ce tawagar jami'an za su gudanar da ayyuka ne da suka hada da farautar maso yin garkuwa da mutane da 'yan fashi da makami da suka addabi yankunan jihar watanni da dama suka shude.
Yakubu, ya ce tuni aka baza jami'an na musamman zuwa sassan jihar.
A cewarsa, jami'an za su yi aiki tare da takwarorinsu dake jihar, domin kakkabe masu garkuwa da mutane da 'yan fashi da makami da sauran masu aikata laifuka wadanda ke cin karensu ba babbaka. (Ahmad Fagam)
