Jiya Litinin 23 ga wata ne aka bude babban taron kiyaye muhalli na MDD karo na biyu a hedkwatar hukumar kiyaye muhalli ta MDD wato UNEP dake babban birnin Nairobin kasar Kenya, inda wakilai kimanin dubu 2 wadanda suka zo daga kasashe mambobin MDD 173, da hukumomin MDD, da wasu kungiyoyi masu zaman kansu suka halarci taro.

Cikin jawabin sa na bude taron, shugaban hukumar UNEP Achim Steiner ya bayyana cewa, a taron wannan karo, za a mai da hankali kan yadda za a aiwatar da jadawalin neman dauwamammen ci gaba na shekarar 2030 a fannin kiyaye muhalli, da kuma yadda za a iya kyautata muhalli a zaman rayuwar bil Adam, domin kiyaye lafiyar mutane.

Wannan taron kiyaye muhalli na kwanaki biyar da za a yi, zai mai da hankali kan tattauna batutuwan dake shafar gurbatacciyar iska, da cinikin naman daji ba bisa ka'ida ba, da dai sauransu. Har wa yau za a gaggauta aiwatar da sakamakon babban taron sauyin yanayi na Paris. (Maryam)