160519-najeriya-za-a-bude-sansanin-horaswa-na-yan-wasan-kokawa-gabanin-fara-gasar-olympics-bello.m4a

Hukuma mai kula da wasan kokawa ta kasar Najeriya, ta sanar da cewa za ta bude sansanin horas da 'yan wasan kokawa cikin wannan mako domin amfanar 'yan wasan kokawar kasar 7, wadanda za su halarci wasannin Olympics a kasar Brazil.

Shugaban hukumar wasan kokawa ta Najeriya Daniel Igali, shi ne ya gaya wa manema labaru hakan a jihar Legas, yana mai cewa an tsai da kudurin hakan ne, ganin yadda ma'aikatar harkokokin wasannin kasar ta yi jinkirin kaddamar da horaswa ga 'yan wasan da za su halarci gasar ta Olympics.

Jami'in ya ce hukumarsa ba za ta ci gaba da jira ba, ganin cewa za a fara wasan a watan Agusta, amma har yanzu ba a fara horar da 'yan wasan kasar ba.

'Yan wasan da za su shiga sansanin horaswa da hukumar ta kafa sun hada da maza 2 da mata 5, wadanda suka samu gurbi na halartar wasannin Olympics na wannan karo.(Bello Wang)