Shugaban diplomasiyyar Nijar ya bayyana hakan a yayin wata ganawar aiki tare da ministocin harkokin wajen kasashen Faransa da Jamus, Jean-Marc Ayrault da Frank-Walker Steinmeier, da suka kai wata ziyarar aiki a Nijar a ranar Talata.
Shugabannin diplomasiyyar kasashen Faransa da Jamus sun je Nijar domin tattaunawa tare da manyan hukumomin kasar kan batun tsaro a yankin Sahel da kuma musamman ma babbar matsalar kwararar bakin haure.
Domin yaki da bakin haure ba bisa doka ba, ya kamata a yi yaki da dalilan da suka haddasa rashin tsaro, talauci, raunin demokaradiyya a cikin wasu kasashe, da kuma sauyin yanayi, in ji mista Yacouba.
A kasar Nijar, gwamnati ta amince da wani tsari na kudin Euro biliyan daya wanda a cikinsa kasar take bukatar taimakon gamayyar kasa da kasa, musammun ma kungiyar tarayyar Turai domin samar da kudaden gudanar da wadannan ayyukan da za su taimaka wa wajen warware matsalolin da suka zama tushe na hijira ba bisa doka ba. (Maman Ada)
