Mahukunta a Najeriya sun sake maido da dokar nan da ta haramta shigar da shinkafa ta kan iyakokin kasar na kasa, sakamakon yawaitar ayyukan masu fasakwauri.
Cikin wata sanarwar da ya fitar game da daukar wannan mataki, kakakin hukumar hana fasakwauri ta kasar NCS, Wale Adeniyi, ya ce hukumar ta samu wagegen gibi daga harajin shigar da shinkafa cikin kasar ta hanyoyin mota. Yace hakan ne ya sa gwamnati ta ga dacewar daukar matakin dakatar da shigar da shinkafar don dakile ci gaban ayyukan sumoga wanda ya yi matukar karuwa tun daga watan Janairun da ya gabata kawo yanzu.(Saminu Alhassan)
