Gwamantin Liberiya a ranar Talatan nan ta sanar da cewar ta rufe kan iyakarta da kasar Guinea bayan labarin mutuwar mutane biyu sakamakon cutar Ebola da ya sake bullowa a kasar.

Rundunar dakarun tsaron hadin gwiwwa na kasar Liberia ta rufe muhimman tasoshin bincike guda hudu dake kan iyakokin kasar a arewa maso gabashin gundumar Nimba tun ranar Jumma'an da ta gabata.

Sannan, an hana mazauna wurin da su yi ciniki tsakanin kasashen biyu.

Kasar Guinea dai a makon jiya ta tabbatar da cewar an samu sabbin mutane biyu wadanda suka kamu da cutar bayan da hukumar kiwon lafiya ta duniya WHO ta sanar da karshen cutar a kasar yau fiye da watanni biyu da suka gabata. (Fatimah Jibril)