Shugaban kasar Argentina Mauricio Macri, ya bayyana kaunarsa ga zakaran kwallon kafan nan na Barcelona Lionel Messi, har ma ya kara da cewar Messi ne zabinsa na farko kafin Diego Maradona, idan ana maganar taka leda ne a wasannin yau da kullum.

Shugaban kasar na Argentina ya fadi hakan ne a zantawarsa da kafofin yada labaru na kasar Faransa France 24, da kuma RFI, ya ce idan wasan karshe ne zai iya zabar Maradona, amma a wasannin da ake bugawa na yau da kullum ya fi amincewa da Messi.

Sai dai ra'ayin na mista Macri zai iya kasancewa mai sarkakiya, kasancewar shi Maradona, ana ganinsa a matsayin dan wasan da ya fi shahara a duniya a tsawon lokaci, yayin da Pele da Zinedine Zidane ke bi masa baya.

To sai dai irin bajintar da shi Messi ke nunawa a kungiyar sa ta Barcelona, tana kara daga martabarsa, tare da ba shi babban matsayi a idon duniya.

Dan wasan mai shekaru 28, ya zura kwallaye 301 a wasanni 335 ga kungiyar Barcelona, sannan ya zura kwallaye 49 a wasanni 105 a kungiyar sa ta gida wato kasar Argentina. (Ahmad Fagam)