Ministan harkokin cinikayya na kasar Sin Gao Hucheng ya bayyana a jiya cewa, hukumomin majalisar gudanarwa ta kasar Sin sun dauki nauyin gudanar da ayyuka 366 na shirye-shiryen raya yankunan yin ciniki cikin 'yanci na gwaji 4, wadanda majalisar gudanarwar kasar Sin ta gabatar a watan Afrilu na bara. Yawan wadannan yankuna ya kai kashi 80 cikin dari bisa na dukkan ayyukan shirye-shiryen. Ma'aikatar harkokin cinikayya ta kasar Sin za ta ci gaba da daidaita ayyukan hukumomi da na gwamnatocin kananan hukumomi don gaggauta gudanar da shirye-shiryen ayyukan a dukkan fannoni.

Gao Hucheng ya bayyana a gun taron manema labaru da ofishin watsa labaru na majalisar gudanarwar kasar Sin ya gudanar cewa, ana raya yankunan yin ciniki cikin 'yanci na gwaji yadda ya kamata, kana an samu nasarori game da batutuwan da suka shafi tsari, sassauta harkokin gwamnatoci, mika iko ga kananan hukumomi da dai sauransu.

Gao Hucheng ya kara da cewa, a kokarin da ake na sassauta harkokin ciniki, an bullo da wani tsarin musamman na cinikin kasa da kasa a yankunan yin ciniki cikin 'yanci, sannan yadda hukumar kwastan ta ke gudanar da ayyukanta ya karu da kashi 40 cikin dari, kuma saurin yana ci gaba da karuwa. (Zainab)