Babban sakataren MDD Ban Ki-moon, ya yi Allah wadai game da harin ta'addanci da aka kaddamar kan ofishinta dake kasar Mali MINUSMA, lamarin da ya yi sanadiyyar hallaka jami'an dake aikin wanzar da zaman lafiya 5 da kuma jikkata a kalla mutane 30.

An kaddamar da harin ne kan ofishin na MINUSMA wanda ke garin Kidal a arewacin Mali a ranar Jumma'ar da ta gabata.

A sanarwar da mai magana da yawun magatakardan MDD ya fitar, ya bayyana kaddamar da hare hare kan jami'an aikin wanzar da zaman lafiya a matsayin yin keta dokokin kasa da kasa da suka haramta aikata laifukan yaki, sannan ya bukaci gwamnatin Mali da ta gaggauta gudanar da bincike domin zakulo wadanda ke da hannu a kai harin domin hukunta su.

Ban, ya kara da cewa kaddamar da hari kan ofishin na MINUSMA, ba zai taba sanyaya gwiwa MDD ba a yunkurinta na tallafawa gwamnatin kasar Mali domin samun dawwaumamman zaman lafiya da tsaron rayukan al'ummar kasar. (Ahmad Fagam)