Kafafen yada labarai na kasar Ghana, sun rawaito cewar a ranar Larabar da ta gabata ne wani mutum guda ya gamu da ajalinsa, sannan wasu da dama suka jikkata a sakamakon fashewar wasu abubuwa a wani wurin fasa dutse dake da tazarar kilomita 40 daga Accra babban birnin kasar Ghana.

A cewar Nketia Yeboah, Daraktan hulda da jama'a na hukumar 'yan sanda shiyya a gabashin kasar ya ce, fashewar dai ta afku ne a wani wurin fasa duwatsu na kamfani na Akuabo wanda aka yi watsi da shi sama da shekaru 4 da suka gabata.

Yeboah, ya kara da cewar, ana cigaba da duba lafiyar wadanda suka samu raunuka a wani asibitin gwamnati na Nsawam, yayin da wasu daga cikinsu sun riga suka koma gida bayan da aka yi musu jinya. (Ahmad Fagam)