Atletico Madrid za ta kara da PSV, a wasan da ake kallo a matsayin mai matukar wuya ga sassan biyu, yayin da Real Madrid kuma za ta kara da Roma, kana FC Barcelona za ta kwashi 'yan kallo da Arsenal.
Game da wasan su na gaba, daraktan hulda da 'yan jaridu na kulaf din Real Madrid Emilio Butragueno, ya ce ya zama wajibi su zage damtse, duk kuwa da sa'ar da suka yi na tsallakawa wannan zagaye tare da 'yan wasan su dake cike da koshin lafiya.
Butragueno, ya ce za su kara da kungiya mai karfi, wadda ta taka rawar gani. Ya ce idan kungiyar sa ta yi sakaci ko zaton samun nasara cikin sauki za su gamu da cikas.
A daya hannun kuma Daraktan kungiyar Barcelona Roberto, ya ce sun yi sa'ar kaucewa haduwa da PSG a wannan gaba, amma duk da haka ya amince da kwarewar kungiyar Arsenal wadda da ita ne za su kara a wasan dake tafe.
Shi kuwa a nasa bangare, daraktan kungiyar Atletico Madrid Clemente Villaverde bayyana PSV ya yi a matsayin kungiya mai matukar karfi, wadda a baya ta kafa tarihi mai yawa a nahiyar turai, kungiyar da kuma a cewar sa ko shakka babu za su kai ruwa rana da su.(Saminu Alhassan)
