151105-U17-Najeriya-ta-kai-wasan-kusa-da-na-karshe-bayan-da-ta-doke-Brazil-zainab.m4a

Kungiyar kwallon kafar Najeriya ta matasa 'yan kasa da shekaru 17, ta doke takwarar ta ta Brazil da ci 3 da nema, a wasan da suka buga a Lahadin karshen makon jiya. Yanzu haka dai Najeriyar ta kai ga wasan kusa da na karshe a gasar cin kofin duniya ajin 'yan kasa da shekaru 17 dake wakana a kasar Chile.

Da fari dai Brazil ce ta rike wasan, inda 'yan wasan ta suka rika kai hare-hare ragar Najeriya. Sai dai yanayin wasan ya sauya bayan da dan wasan gaban Najeriya Akpan Udoh ya shigo fili.

A cikin minti na 29 ne kuma Victor Osimhen ya zura kwallo a ragar Brazil. Sai kuma kwallo Kingsley Michael a minti na 30, kafin kuma Udochukwu Anumudo ya zura kwallo ta uku a ragar Brazil.

Dukkanin kokari da 'yan wasan Brazil suka yi na su farke kwallayen ya ci tura, haka kuma aka tashi Najeriya na da kwallo 3 Brazil tana nema. (Saminu Alhassan)