Jami'an Najeriya sun tabbatar da mutuwar mutane 15, sannan wasu 39 sun jikkata sakamakon harin bom wanda ya afku a ranar Jumma'ar nan a kusa da babban birnin kasar.

A Nyanya, harin ya kashe mutane 2 ne, sannan ya raunata wasu 19. Yayin da a kauyen Kuje dake kusa da birnin na Abuja harin ya kashe mutane 13 da kuma raunata wasu 20.

Jami'in hukumar ba da agaji ta NEMA Ishaya Chonoko, ya tabbatar da wannan adadi.

Ya ce tuni aka kwashe gawawwakin wadanda suka mutu da wadanda suka samu munanan raunuka zuwa babban asibitin Asokoro dake Abuja.

Kwamishinan 'yan sandan babban birnin Wilson Inalegwu, shi ma ya tabbatar da faruwar harin. (Ahmad Fagam)