Hukumar tsaron kasar Kamaru ta sanar da cewa, an kai wasu hare-hare biyu da sanyin safiyar yau a lardin arewa mai nisa na kasar, yankin dake kan iyaka da kasar Najeriya, inda aka halaka mutane fiye da 10, tare da lalata wasu gidaje da motoci.
Wata majiyar hukumar ta ce an kai hari na farko ne misalin karfe 2 na dare agogon wurin a wani kauye dake kusa da garin Mora a lardin arewa mai nisa wanda ya yi sanadiyar mutuwar mazauna kauyen guda 9, harin da ake zargin mayakan kungiyar Boko Haram da kai wa, kana suka kona wasu gidaje. Sannan bayan sa'a guda da harin farko sai kuma an kai hari na biyu kan dakarun gwamnatin kasar Kamaru da aka jibge a yankin dake kan iyaka da Najeriya, inda sojoji biyu suka mutu, kana motocin soja 4 da wasu motocin daukar kaya na jama'a suka lalace. (Sanusi Chen)
