Da yake tsokaci cikin jawabinsa na bude taron, shugaban zaman Mogens Lykketoft, ya ce akwai hasashen taron zai zamo mai matukar muhimmanci a tarihi, duba da cewa za a tabo batutuwa da dama wadanda ake fatan amincewa da su, a yayin taron majalissar wanda ke tafe tsakanin ranekun 25 zuwa 27 ga watan nan na Satumba.
Ana dai gudanar da taron MDDr ne a duk shekara. A bana Mr. Lykketoft daga kasar Denmark ne ke jagoran taron, an kuma zabe shi ya shugabanci zaman ne a taron MDDr a ranar 15 ga watan Yunin wannan shekara.
Kafin nadin nasa, ya jagoranci majalissar dokokin kasar Denmark tun daga shekarar 2011 zuwa farkon wannan shekara da muke ciki.(Saminu)
