A jiya Lahadi 13 ga watan nan na Satumba ne aka kira taron tattaunawa game da aikin tallafawa jihar Tibet karo na 7, na ma'aikatar aikin adana ruwa na kasar Sin a birnin Lahsa fadar mulkin jihar, inda mahalarta taron suka fidda wani shirin na taimakawa jihar Tibet wajen raya aikin adana ruwa cikin shekaru 5 masu zuwa, shirin da ya tanaji gina karin kayayyakin more rayuwa, da samar da nagartacciyar hidima ga jama'ar jihar, musamman ma ta fuskar aikin adana ruwa.

A bisa tsarin wannan shiri, za a fadada kwarewar jihar Tibet a fannin aikin ban ruwa, da tsimin ruwa, da gina karin kayayyakin adana ruwa a kauyukan jihar, da kyautata fasahohin jihar a fannin magance bala'i, da kiyaye muhalli a yankunan dake daf da tabkuna da koguna, da gyare-gyaren tsarin aikin adana ruwa nan da shekarar 2020.

Ministan aikin adana ruwa na kasar Sin Chen Lei, ya bayyanawa mahalarta taron da aka kira a ranar Lahadi cewa, jihar Tibet ta kasance mafarin manyan kogunan kasar Sin, da yankin adana ruwa na kasar, tana kuma da wani matsayi mai muhimmancin gaske a fannin tsaron muhalli a kasar. Don haka a cewar sa tilas ne a yi kokarin fidda manyan tsare-tsare masu nagarta, ta yadda za a samu daidaito tsakanin cin gajiyar albarkatun ruwa, da kuma kokarin tsimin sa. (Bello Wang)