Wani kamfanin kasar Sin ya rattaba hannu a kan kwangila ta dalar Amurka biliyan 1.487 tare da rukunin kamfanonin Dangote a kasashen Afrika da dama.

Kamfanonin da Sinoma international engineering na Sin zai gina za'a yi su ne a kasashen da suka hada da Ghana, Habasha, Kwaddibuwa, Kamaru, Mali, Niger, Senegal, Zambiya da kuma Kenya.

Ana sa ran wadannan za su kara adadin metric tan miliyan 25 a wanda yanzu haka kamfanin Dangoten ke samarwa na kusan metric tan miliyan 50.

Shugaban rukunin kamfanonin Dangote wanda alkalumma suka nuna shi ne mafi arziki a Nahiyar Afrika, Alhaji Aliko Dangote ya shaida ma manema labarai a birnin Ikko na Nigeriya a lokacin rattaba hannun ranar laraban nan cewa ana sa ran aikin gina kamfanonin samar da simintin za'a kamala su ne a cikin watanni 30 a kuma yi bikin bude su a kasar Kamaru.

Alhaji Aliko Dangote ya ce wannan aiki wani ci gaba ne da aka samu a shirin da kamfanin yake yi na kara yawan simitin da yake samarwa zuwa metrik tan miliyan 100 nan da shekara ta 2020. (Fatimah)