Al-Bashir ya bayyana hakan ne yayin zantawar sa da jakadan firaministan kasar Libiyan Nuri Almal, wanda ya gabatar ma sa rubuttacen sako daga firaministan Libiyan Abdullah al-Thani. Sakon da ke kunshe da bayanan irin ci gaba da aka samu, a kokarin warware rikcin siyasar kasar ta Libiya.
Da yake tsokaci game da hakan, shugaba Al-Bashir ya nanata burin ganin an koma teburin shawarwari, tsakanin sassan dake adawa da juna a kasar ta Libiya. Ya ce alakar kasashen biyu na kara inganta a dan tsakanin nan, bayan tsamin da dankantakar ta su ta yi a baya.
A karshen shekarar da ta gabata ma dai Sudan ta kira taron shugabannin kasashe makwaftan Libiya, domin duba yiwuwar shawo kan rikicin kasar. A kuma wannan lokaci ne aka fidda sanarwar bayan taro da ta yi kira ga daukacin bangarorin dake dauke da makamai a Libiyan da su koma zaman tattaunawa
Libiya, wadda ke da tarin arzikin mai a yankin Arewacin nahiyar Afirka, na shan fama da rikicin siyasa tun bayan kifar da gwamnatin shugaba Muammar Gaddafi a shekarar 2011, inda a yanzu sashen masu ra'ayin baruwan mu, da na masu ra'ayin Islama ke kokawar amshe madafan ikon kasar.(Saminu)
