Majalisar dokokin kasar Madagascar ta zartas da wani kuduri na yunkurin tsige shugaban kasar Hery Rajaonarimampianina ta hanyar jefa kuri'un yanke kauna. Wata sanarwa da majalisar ta gabatar, ta nuna cewa tuni 'yan majalisu 125 cikin jimillar 'yan majalissa 151 suka jefa kuri'unsu. Kuma 121 sun amincewa da kudurin, sai kuri'u 4 na wadanda ke adawa da hakan. Hakan dai ya nuna cewa kuri'un wadanda suka amincewa da wancan kuduri sun kai kashi 2 cikin 3. Bisa tsarin mulkin kasar ta Madagascar, kotun kolin kasar mai lura da tsarin mulki ce za ta yanke hukuncin karshe game da sakamakon kuri'un da 'yan majalissun suka kada. (Lami)